Naturvernarar gler seg over at Posten gir opp Kokstad
Forum for natur og friluftsliv i Hordaland er glad for at Posten Bring no gir opp kampen om Kokstad-tomta i Bergen.
– For natur- og friluftslivinteressene er dette veldig bra, seier koordinator Gunvar Mikkelsen.
Postens nye logistikksenter skal i staden bli bygd i Lyseparken i Bjørnafjorden kommune.
Naturvernarar har klaga inn Kokstad-bygginga to gonger sidan 2016 for å verne om myr og raudlista artar. Kommune og statsforvaltar har brukt lang tid på å handsame klagene.
Chris Jørgen Rødland i Bergen Høgre er skuffa over at arbeidsplassar blir flytta ut av kommunen. Han meiner kommuneplanane må bli meir næringsvenlege.
– No må alarmklokkene begynne å ringe. Når ein så stor aktør som Posten vel å legge inn årene, kan ein tenke seg korleis det er for små og mellomstore bedrifter, seier han til NRK.