Kan bli stor butikkstreik tysdag
Sundag starta meklinga mellom Virke og Handel og Kontor (HK) hos Riksmeklaren. Fristen er sett til midnatt 30. april.
Årsaka til brotet i lønnsoppgjeret er usemje om økonomi, kompetanse, sjukelønn og oppgjeret som heilskap, skriv HK på nettsidene sine.
Om partane ikkje vert einige, kan det bli storstreik. Det er daglegvarebutikkar, byggevarebutikkar og taxfreebutikkar som kan bli ramma av streiken.
Mellom anna har Norgesgruppen og Coop tilsette i Meny, Kiwi og Coop Extra som kan bli tekne ut i streik, ifølge HK.
Blir det storstreik, varslar HK at det også vil gjelde byggvarekjeder, og ramme Byggmakker og Løvenskiold.
Uttaket omfattar om lag 4.256 HK-medlemmar fordelt på verksemder over heile landet.
