Hamnespy kan vere på veg inn Oslofjorden
Miljødirektoratet ber båteigarar i Oslofjorden seie ifrå om dei mistenker funn av framandarten hamnespy, som nyleg blei oppdaga på Koster i Sverige.
– Kosterøyane ligg svært nær Ytre Hvaler nasjonalpark, og vi er uroa for at hamnespy skal spreie seg til kysten av Hvaler. Vi ber difor folk som ferdast langs kysten i ytre delar av Oslofjorden om å vere merksame, seier direktør Ellen Hambro i Miljødirektoratet i ei pressemelding.
Foreløpig er det oppdaga hamnespy i fem hamneområde i Noreg, alle på Vestlandet. Den beige-oransje framande arten legg seg som store teppe på havbotnen, og fører til at andre dyr og artar ikkje kan leve der.
DNA-prøvar frå kysten rundt Ytre Hvaler vil vise om det er spor av arten i vatnet. Resultata skal vere klare før jul.
(NTB)